Fyrsti hópur sýrlenskra flóttamanna koma til Íslands í dag

By on 19, janúar 2016
22 af þeim 35 einstaklingum sem nú koma til landsins eru börn. Jeff J Mitchell/Getty Images

22 af þeim 35 einstaklingum sem nú koma til landsins eru börn. Jeff J Mitchell/Getty Images

Sex sýrlenskar fjölskyldur, þar af 13 fullorðnir og 22 börn, koma til Íslands í dag en um er að ræða fyrsta hóp flóttafólks sem boðin hefur verin búseta hér á landi.

Fjórar þessara fjölskyldna munu setjast að á Akureyri en tvær þeirra í Kópavogi en velferðaráðuneytið gerði samninga við Akureyri, Kópavog og Hafnarfjörð í nóvember síðastliðnum um móttöku 55 sýrlenskra flóttamanna.

Barnshafandi kona sem fyrirhugað var að kæmi einnig í dag ásamt fjölskyldu sinni reyndist ekki fær um að takast á hendur ferðalagið og frestast því koma þeirra til landsins, segir á vef velferðaráðuneytisins.

Þrjár fjölskyldur til viðbótar sem höfðu lýst áhuga á að setjast að á Íslandi hættu við að koma. Flóttamannastofnun Sameinuðu þjóðanna hefur í samvinnu við íslensk stjórnvöld undirbúið komu hóps flóttafólks í stað þeirra sem sáu sér ekki fært að koma. Stefnt er að því að sá hópur komi innan fárra vikna og að fólkið setjist að í Hafnarfirði og Kópavogi.

Eygló Harðardóttir, félagsmálaráðherra, leggur áherslu á að móttaka flóttafólks verði áfram viðfangsefni íslenskra stjórnvalda og að í undirbúningi sé móttaka fleiri hópa á þessu ári.

Ráðgert var að fólkið kæmi til landsins í lok desember sl. en af óviðráðanlegum ástæðum reyndist það ekki mögulegt.

Hópurinn kemur með flugi frá Beirút með millilendingu í París.